Bharat Gogawale VS Sunil Tatkare : रायगडमध्ये महायुतीत सुरु असणारी धुसफूस काही केल्या कमी होताना दिसत नाही. शिवसेनेचे मंत्री भरत गोगावले आणि खासदार सुनील तटकरे यांच्यात सुरु असलेल्या शीतयुद्धाचं रुपांतर आता वादात झालं असून हा वाद आता चव्हाट्यावर येताना दिसत आहे. रायगडचा पालकमंत्रीपदाचा वाद अद्याप सुटलेला नसताना आता भरत गोगावले आणि सुनील तटकरे यांच्यात प्रत्यक्षात राजकीय वाद उफाळताना दिसतोय. त्यामुळे युतीत आता कुस्ती होताना दिसतेय.
1/7आधी भरत गोगावलेंचा दगा दिल्याचा आरोप
"विधानसभा निवडणुकीत खासदार सुनील तटकरे यांनी आपल्याला दगा दिला", असा आरोप शिवसेना मंत्री भरत गोगावले यांनी केला होता. त्यांच्या आरोपांना सुनील तटकरे यांनी प्रत्युत्तर दिलं.
2/7सुनील तटकरेंकडून गोगावलेंची नक्कल
सुनील तटकरे यांनी भरत गोगावले यांना प्रत्युत्तर देताना गोगावलेंची भर कार्यक्रमात नक्कल केली. यावेळी कार्यक्रमात एकच हशा पिकला. सुनील तटकरे यांनी भाषणाच्या शेवटी नॅपकीन खांद्यावर ठेवत भरत गोगावलेंची नक्कल केली. त्यांनी आपल्या भाषणातही गोगावलेंना उद्देशून काही वक्तव्ये केली.
3/7स्नेहल जगताप यांच्या पक्षप्रवेशाचा कार्यक्रमात तटकरेंकडून नक्कल
ठाकरे गटाच्या स्नेहल जगताप यांनी रविवारी उपमुख्यमंत्री अजित पवार यांच्या नेतृत्वातील राष्ट्रवादी काँग्रेसमध्ये प्रवेश केला. या कार्यक्रमावेळी सुनील तटकरे उपस्थित होते. याच कार्यक्रमात सुनील तटकरे यांनी भरत गोगावले यांची नक्कल केली. तसेच गोगावलेंना प्रत्युत्तर दिलं.
4/7सुनील तटकरेंनी मतांचा हिशोब मांडला
सुनील तटकरे यांनी यावेळी जाहीर कार्यक्रमात मतांचा हिशोब मांडला. 60 हजार मतांनी दगा दिला, असं म्हणायचं आहे का? असा सवाल सुनील तटकरे यांनी केला. तसेच संयमाचा कडेलोट होऊ देऊ नका, असंही गोगावलेंनी सुनावलं आहे.
5/7सुनील तटकरे नेमकं काय म्हणाले?
या मतदारसंघात राष्ट्रवादी काँग्रेसचे 30 हजार मतदार आहेत, असं तेच सांगतात. मला केवळ साडेतीन हजारांचं मताधिक्य मिळालं. ते 26 हजार मतांनी निवडून आले. राष्ट्रवादी काँग्रेसचं एकही मत त्यांना मिळालं नाही असं गृहीत धरलं तर लोकसभेला 26 हजार त्यांचे आणि माझे 30 हजार असे 60 हजार मतांनी मला दगा दिला, असं मी म्हटलं तर आपली काय अवस्था होईल? असा सवाल सुनील तटकरे यांनी केला.
6/7भरत गोगावलेंचं प्रत्युत्तर
खरं-खोटं करायचं असेल तर मंदिरात या, असं भरत गोगावले म्हणाले आहेत. "त्या भागात शंभर टक्के गावामध्ये आम्हाला 25 मते मिळत आहेत आणि त्यांना 325 मते मिळत आहेत, असे अनेक उदाहरणे आहेत. त्यांना खरोखर वाटत असेल की, मी कुठल्याच कार्यकर्त्याला आणि फोन करुन सांगितलं नाही, तर त्यांनी तळोजच्या रंगू आईच्या मंदिरात यावं. तिथे आम्ही दोन फुलं ठेवतो. पुजाऱ्यांना सांगतो की, मी त्यांच्यावर खोटे आरोप करत असेन तर माझं नुकसान व्हावं. ते खोटं बोलत असतील तर त्यांचं व्हावं", असं प्रत्युत्तर भरत गोगावले यांनी दिल आहे.
7/7'भरत शेठ गोगावले तिथून निवडून येणार ही कळ्या दगडावरची भगवी रेघ'
मंत्री उदय सामंत यांनी सर्व घडामोडींवर प्रतिक्रिया दिली. "भरत शेठ गोगावले यांचा रुमाल खांद्यावर नसतोच. खांद्यावर रुमाल टाकणारा नेता कोण आहे हे मला शोधावे लागेल. अजून कितीही निवडणुका झाल्या तरी भरत शेठ गोगावले तिथून निवडून येणार ही कळ्या दगडावरची भगवी रेघ", असं उदय सामंत म्हणाले आहेत.
